संपादक: मोईन सय्यद / प्रतिनिधी: अवधुत सावंत
नोकरीचं आमिष दाखवून फसवणूक करण्यात आल्याचा आरोप सैराट फेम प्रिन्सवर आहे. याप्रकरणी संशियतांवर गुन्हा दाखल करण्यात आला असून यात सुरज पवार याचाही समावेश आहे. सैराट चित्रपटातील आर्चीचा भाऊ प्रिन्सदादा अर्थात अभिनेता सुरज पवार याला अटक होण्याची शक्यता आहे.
मंत्रालयात नोकरी लावून देतो असं आमिष दाखवून तरुणाला पाच लाख रुपयांना गंडवल्याचा आरोप त्यांच्यावर आहे. नेवासा तालुक्यातील भेंडा बुद्रुक गावातील महेश वाघडकर या तरुणाची फसवणूक करण्यात आली असून फसवणूकीसाठी चक्क भारतीय राजमुद्रेचा गैरवापर करण्यात आला होता. संशयित आरोपींनी सामाजिक न्याय विभागात कक्ष अधिकारी म्हणून मंत्रालयात नोकरीला असल्याचं महेश वाघडकर या तरुणाला सांगितलं होतं. यासाठी सुरज पवार याने संगमनेरमधून बनावट शिक्के बनवले होते. याप्रकरणी पोलीसांनी तिघांना अटक केल्याची माहिती आहे. त्यांच्याकडून मिळालेल्या माहितीनुसार याप्रकरणात अभिनेता सुरज पवारचाही सहभाग असल्याचं समोर आलं आहे. त्यामुळे सुरज पवारला अटक होण्याची शक्यता आहे.
