मुंबई, प्रतिनिधी: डिप वेन थ्रोम्बोसिस या विकाराने पिडीत असलेल्या एका ५९ वर्षीय महिलेवर मीरारोड येथील वॉक्हार्ट रूग्णालयात यशस्वी उपचार करण्यात आले आहे. या आजारामुळे महिलेच्या डाव्या पायाला मोठी सूज आली होती. आता महिलेची प्रकृती उत्तम असून तिला घरी सोडण्यात आले आहे.
मीरारोड येथील वॉक्हार्ट रुग्णालयातील कन्सल्टंट इंटरव्हेन्शनल कार्डिओलॉजिस्ट डॉ. आशिष मिश्रा यांच्या नेतृत्वाखाली एका टीमने ही शस्त्रक्रिया केली आहे.
विरारमध्ये राहणाऱ्या वंदना देसाई (नाव बदललेले आहे) यांना पायात असहय वेदना जाणवत होत्या. पायाला सूज असल्याने त्यांना चालतानाही येत नव्हतं. डॉक्टरांच्या सल्ल्यानुसार वैद्यकीय चाचणी केली असता त्यात डिप वेन थ्रोम्बोसिस असल्याचं निदान झालं.
डीप वेन थ्रोम्बोसिस ही एक वैद्यकीय स्थिती आहे. विशेषतः पायांमध्ये रक्ताच्या गुठळ्या तयार होतात. ही समस्या संसर्ग व जळजळ किंवा इतर कारणांमुळे होऊ शकते. डीवीटी विविध कारणांमुळे होऊ शकतो. ज्यामध्ये शस्त्रक्रिया, दुखापत, गर्भधारणा, हार्मोन थेरपी, कर्करोग आणि काही अनुवांशिक किंवा शारीरिक विकार यांचा समावेश होतो.
डीवीटीच्या लक्षणांमध्ये प्रभावित भागात वेदना, सूज, उबदारपणा आणि लालसरपणा यांचा समावेश होतो. याशिवाय डीवीटी असलेल्या काही लोकांना कोणतीही लक्षणे जाणवत नाही. डीवीटीच्या निदानामध्ये सामान्यतः अल्ट्रासाऊंड, सीटीस्कॅन यांसारख्या इमेजिंग चाचण्यांचा समावेश असतो. रक्ताच्या गुठळ्या तयार होऊ नयेत आणि फुफ्फुसात जाण्यापासून रोखण्यासाठी अंटीकोआगुलंट औषधे (रक्त पातळ करणारे) समाविष्ट असतात.
मीरारोड येथील वॉक्हार्ट रूग्णालयातील सल्लागार इंटरव्हेंशनल कार्डिओलॉजिस्ट डॉ. आशिष मिश्रा म्हणाले की, “रूग्णाच्या पायाची सूज डाव्या मांडीपर्यंत वाढली होती. इकोकार्डियोग्राफी हे सौम्य पल्मोनरी हायपरटेन्शन सह हृदयाचे सामान्य कार्य सूचित करते. शस्त्रक्रियेनंतर पुढील ३ दिवसांत डाव्या खालच्या अंगावरील सूज ५०% पेक्षा जास्त दूर झाली आणि रूग्णाला वैदयकीयदृष्ट्या सुधारित स्थितीत ओरल अँटीकोग्युलेशन आणि सपोर्टिव्ह थेरपीने सोडण्यात आले.
रूग्ण महिलेनं आपल्या भावना व्यक्त करताना म्हटले की, “माझ्या पायाला सूज आली होती. ज्यामुळे मला चालणे, उभे राहणे किंवा बसणे देखील कठीण होत होते. दैनंदिन कामे करण्यासाठीही कुटुंबियांवर अवलंबून राहावे लागत होते. शिरांशी संबंधित दुर्मिळ जन्मजात शारीरिक विकार असल्याचं निदान झाल्यावर मी घाबरून गेले होते. पण वेळीच निदान व उपचार करून माझे प्राण वाचविल्याबद्दल मी वॉक्हार्ट रूग्णालयातील डॉक्टरांचे आभार मानते. आता मी ठीक झाली असून माझी दैनंदिन कामे करू लागली आहे.”