संपादक: मोईन सय्यद / प्रतिनिधी: अवधुत सावंत
मीरा भाईंदर : सध्या राज्यात कोरोनाने थैमान घातलेले असतानाच कोविड-१९ आजाराने ऍडमिट असलेल्या रुग्णांची नावे व आधार कार्डच्या साहाय्याने कोविड-१९ आजाराची खोटी निगेटिव्ह प्रमानपत्रे तयार करणाऱ्या एका इसमास काशिमीरा गुन्हे शाखा कक्ष-१ च्या पोलिसांनी अटक केली आहे.
याबाबत मिळालेले वृत्त असे आहे कि, एस.आर.एल.लॅब, मिरारोड स्टेशन येथे काम करणारा एक इसम १०००/- रुपयांच्या बदल्यात त्याला लोकांच्या आधारकार्डचा फोटो पाठविल्यानंतर कोणत्याही प्रकारे
स्वॉब न घेता अथवा कोणतीही चाचणी न करता त्यांचे कोविड-१९ या आजाराचे बनावट निगेटिव्ह प्रमाणपत्र देत असल्याची माहिती गुप्त बातमीदारांमार्फत काशीमीरा पोलिसांना मिळाली.
सदर मिळालेल्या माहितीच्या अनुषंगाने पोलिसांनी बोगस गिऱ्हाईकाच्या मोबाईल फोन वरून कोविड-१९ या आजाराने वेगवेगळ्या दवाखान्यात ऍडमिट असलेल्या व रेमडेसीवीर सारखी इंजेक्शन घेत असलेल्या ५ पेशंटची व बोगस गिऱ्हाईक अशा एकूण ६ लोकांची नावे आणि आधार कार्डचे फोटो पाठवून दिले. त्यानंतर वरील ६ लोकांचे कोविड-१९ आजाराचे निगेटिव्ह प्रमाणपत्र बनवून त्याच्या मोबदल्यात प्रत्येकी रोख रक्कम ६,०००/- स्वीकारताना सदर इसम मिळून आल्याने त्याला ताब्यात घेतले.
सदर प्रकरणी त्याच्याविरुद्ध नयानगर पोलीस ठाण्यात गुन्हा दाखल करण्यात आला असून, त्याच्याकडून एस.आर.एल. डायनोस्टिक नाव असलेली कोविड-१९ आजाराची निगेटिव्ह ६ प्रमाणपत्र व एक मोबाईल फोन जप्त करण्यात आला असून या प्रकरणामध्ये एखादी टोळी सक्रिय आहे की काय याचा तपास नयानगर पोलीस करीत आहेत.
