संपादक: मोईन सय्यद / प्रतिनिधी: अवधुत सावंत
सध्या महाराष्ट्रातील वारकरी पंढरपूरकडे पायी दिंडी सोहळ्यात सहभागी झाले आहेत. हजारोंच्या संख्येने भाविकांच्या दिंड्या आषाढी एकादशीसाठी पंढरपूरकडे प्रस्थान करत आहेत. मात्र, दोन दिवसांपूर्वी मिरज-पंढरपूर मार्गावरील कवठेमहांकाळ तालुक्यात केरेवाडी या ठिकाणी आषाढी वारीसाठी पंढरपूरकडे निघालेल्या पायी दिंडीला अपघात झाला होता. भरधाव जिप गाडी दिंडीमध्ये घुसल्याने १७ वारकरी गंभीर जखमी झाले होते.
या सर्वांना मिरजेच्या शासकीय रुग्णालयामध्ये उपचारासाठी दाखल करण्यात आलं होतं. सध्या हे सर्व वारकरी या ठिकाणी उपचार घेत आहेत. या जखमी वारकऱ्यांची मुख्यमंत्री एकनाथ शिंदे यांनी विचारपूस केली. महत्वाचं म्हणजे, त्याआधी मुख्यमंत्र्यांनी रुग्णालय प्रशासनाशी देखील संपर्क केला होता.
या दुर्घटनेत एकूण १९ वारकरी जखमी झाले होते त्यापैकी ३ जणांना घरी सोडण्यात आले आहे, तर उरलेल्या १४ लोकांवर अद्यापही उपचार सुरू आहेत. याबाबत स्वतः मुख्यमंत्र्यांनी रुग्णालयात फोन करून जखमींना योग्य उपचार करण्याचे आदेश दिले होते. या रुग्णालयात सुविधा उपलब्ध नसतील, मात्र गरज पडली तर वारकर्यांना खासगी हॉस्पिटलमध्ये शिफ्ट करा, त्यांच्या संपूर्ण खर्चाची जबाबदारी मी घेतो अशा शब्दात त्यांनी डॉक्टरांना सूचना दिल्या होत्या.
जखमी वारकऱ्यांवर मोफत उपचार करण्यात येतील अशा सूचना देखील मुख्यमंत्री एकनाथ शिंदे यांनी प्रशासनाला दिल्या होत्या. स्वतः मुख्यमंत्री जखमी वारकऱ्यांच्या मदतीसाठी धावून आलेले पाहून बंडखोर आमदार अनिल बाबर वारकऱ्यांच्या भेटीला धावले आहेत. मिरजेच्या शासकीय रुग्णालयात अनिल बाबर यांनी वारकऱ्यांची भेट घेतली. यावेळी मुख्यमंत्री एकनाथ शिंदे यांनी व्हिडीओ कॉन्फरन्सद्वारे जखमी वारकऱ्यांशी संवाद साधला. त्यानंतर आमदार बाबर यांनी मुख्यमंत्र्यांच्याकडून जखमी वारकऱ्यांना प्रत्येकी २५ हजारांची मदत जाहीर केली आहे.
दरम्यान, खानापूरचे शिंदे गटाचे आमदार अनिल बाबर आणि सांगली शासकीय रुग्णालयाचे अधिष्ठाता आणि अधिकारी रुग्णालयात उपस्थित होते. यावेळी जखमी झालेल्या १७ वारकऱ्यांना प्रत्येकी २५ हजार रुपयांची आर्थिक मदत मुख्यमंत्री एकनाथ शिंदे यांच्या वतीने देण्यात येणार असल्याची घोषणा आमदार अनिल बाबर यांनी यावेळी केली.
