संपादक: मोईन सय्यद / प्रतिनिधी: अवधुत सावंत
शिवसेना नेते एकनाथ शिंदे यांच्या बंडामुळे राजकीय वर्तुळात मोठा भूकंप झाला आहे. मुख्यमंत्री आणि शिवसेना पक्षप्रमुख उद्धव ठाकरे आज मुख्यमंत्री पदाचा राजीनामा देणार हे आता स्पष्ट झाले आहे.
या सर्व घडामोडींवर मुख्यमंत्री उद्धव ठाकरे यांनी नुकतेच फेसबुकच्या माध्यमातून संवाद साधला आणि शिवसैनिकांना भावनिक साद घातली. परंतु एकनाथ शिंदे महाविकास आघाडीतून बाहेर पडण्याच्या भूमिकेवर ठाम राहिले आणि त्यामुळे महाविकास आघाडीकडे बहुमत नसल्याचे स्पष्ट झाले. त्यानंतर उद्धव ठाकरे आज मुख्यमंत्रीपदाचा राजीनामा देण्याचे निश्चित केले आहे. याच पार्श्वभूमीवर त्यांनी ‘वर्षा’ सोडलं आणि मातोश्रीवर मुक्काम हलवला. यापुढे ठाकरे पुन्हा वर्षाची पायरी चढणार नाहीत अशीही चर्चाही रंगत आहे.
सोमवारपासून सुरू झालेल्या या राजकीय नाट्याच्या पार्श्वभूमीवर वर्षा बंगल्यावर काँग्रेसचे वरिष्ठ नेते व राष्ट्रवादी काँग्रेसच्या वरिष्ठ नेत्यांसोबत बैठक झाली. या बैठकीत महाविकास आघाडी सरकार टिकवण्यासाठी कोणकोणते पर्याय आहेत, यावर चर्चा आणि विचार मंथन करण्यात आले. यावेळी राष्ट्रवादी काँग्रेसचे वरिष्ठ नेते शरद पवार, सुप्रिया सुळे, जयंत पाटील, तसेच काँग्रेसचे वरिष्ठ नेते कमलनाथ, नाना पटोले, अशोक चव्हाण यांच्यासह इतर नेत्यांनी उद्धव ठाकरे यांची भेट घेऊन सध्याच्या राजकीय परिस्थितीवर चर्चा केली.
तर, दुसरीकडे गटनेतेपदी स्वतः एकनाथ शिंदे कायम राहत, विधिमंडळ पक्षाचे मुख्य प्रतोद म्हणून सुनिल प्रभू यांना हटवून त्यांच्या जागी भरत गोगावले यांची नेमणूक केल्याचे दोन ठराव पारित करून पक्ष प्रमुखांचे आदेश धुडकावले. तसेच महाविकास आघाडीतून बाहेर पडण्याच्या भूमिकेवर ठाम राहिल्याने शिवसेनेसोबतच महाविकास आघाडीची राजकीय कोंडी झाली आहे.
एकनाथ शिंदे यांनी केलेल्या बंडामुळे महाविकास आघाडीकडे बहुमत नाही, असे स्पष्ट झाल्यानंतर उद्धव ठाकरे यांनी मुख्यमंत्रीपदाचा राजीनामा देण्याचे निश्चित केले आहे. त्यामुळेच त्यांनी उशिरा रात्री वर्षा निवासस्थानातील मुक्काम मातोश्रीवर हलवला आणि मुख्यमंत्रीपदाला ‘जय महाराष्ट्र’ करण्याचे ठरवले.
