प्रतिनिधी, अवधुत सावंत(कल्याण) : कल्याण मध्ये एका १७ वर्षीय अल्पवयीन तरुणीला तिचे खासगी फोटो व्हायरल करण्याची धमकी देऊन तिला एका उंच इमारतीच्या अकराव्या मजल्यावरील बंद खोलीत नेऊन २१ वर्षीय आरोपीने बळजबरीने बलात्कार केल्याची धक्कादायक घटना घडली आहे. सदर घटना कल्याण पश्चिम भागातील एका गृहसंकुलात घडली आहे. याप्रकरणी बाजारपेठ पोलीस ठाण्यात गुन्हा दाखल करण्यात आला असून पोलिसांनी आरोपीला बेड्या ठोकल्या आहेत.
सदर आरोपीचे नाव रितिक मांजी आहे. पीडित तरुणी नातेवाईकांना जेवणाचा डबा देऊन दुपारच्या सुमारास घरच्या दिशेने दुचाकीवरून जात होती. त्याच सुमारास कल्याण पश्चिम भागातील एका चौकात आरोपीने तिला रस्त्यात गाठून तिचे खासगी फोटो व्हायरल करण्याची धमकी दिली. त्यामुळे पीडित तरुणी घाबरली होती. याचाच फायदा घेत पुन्हा धमकी देऊन आरोपी तिच्याच दुचाकीवरून बसून तिला कल्याण पश्चिम भागातील एका उंच गृहसंकुलातील अकराव्या मजल्यावर असलेल्या एका बंद खोलीत नेले. त्यानंतर त्याने तिला आरडाओरडा करशील तर मारहाण करण्याची धमकी दिली. त्यानंतर तिच्या इच्छेविरुद्ध तिच्यावर बलात्कार करुन घटनास्थळावरून पसार झाला होता.
घडलेल्या प्रकारामुळे पीडित भयभीत झाली होती. त्यानंतर घरी येऊन तिने तिच्यावर घडलेल्या प्रसंगाची माहिती घरच्यांना दिली. नातेवाईकांनी तिला पोलीस ठाण्यात नेऊन तिच्यावर घडलेल्या प्रसंगाची माहिती महिला पोलीस अधिकाऱ्याना दिली. त्यानंतर पोलिसांनी काही तासातच आरोपीला बेड्या ठोकल्या आहेत.
