संपादक: मोईन सय्यद / प्रतिनिधी: अवधुत सावंत
वाशी येथे मा. पोलीस आयुक्त, पोलीस सह आयुक्त व अप्पर पोलीस आयुक्त, नवी मुंबई यांचे “नशामुक्त नवी मुंबई” या विशेष मोहीम अभियाना अंतर्गत कारवाई सुरू आहे. त्या अनुषंगाने दिनांक १७/०९/२०२१ रोजी गुन्हे शाखेचे वपोनि कोल्हटकर यांना मिळालेल्या बातमीवरून सेक्टर ३०/ए, ओरीसा भवन, वाशी नवी मुंबई परिसरात करण व त्याचे साथीदार हे महाराष्ट्र शासनाने प्रतिबंध केलेला पानमसाला व तंबाखू (सुगंधीत) मालाची अवैधरीत्या विक्री करण्यासाठी आणून तेथे दुसऱ्या वाहनांमधून वितरित करणार आहेत बातमीच्या अनुषंगाने वरिष्ठांच्या सूचनेप्रमाणे दिनांक १७/०९/२०२१ रोजी पहाटेच्या सुमारास वरिष्ठ पोलीस निरीक्षक एन बी.कोल्हटकर यांच्या मार्गदर्शनाखाली पोलीस पथकाने सापळा रचून कारवाई केली. ओरीसा भवन समोरील निर्जन रोडवर एका आयशर ट्रक मधून बोलेरो पिकअप जीप मध्ये काही इसम गोण्यामध्ये असलेला विमल पानमसाला व वी-१ सुगंधित तंबाखू भरत असताना पोलीस पथकाने त्यांना ताब्यात घेण्यासाठी घेराव घातला असता तेथील इसमांनी पोलीसांशी झटापट केली तसेच एक इसम पळून जात असताना शिताफीने त्याचा पाठलाग करून ताब्यात घेतले. त्यादरम्यान तेथील पोलिसांच्या अभिलेखावरील सराईत आरोपी करण राम साळुंखे याने त्याच्याकडील अग्निशस्त्र पोलीसांवर रोखून धाक दाखवून जीवे ठार मारण्याचा प्रयत्न करत कायदेशीर कारवाईस अडथळा निर्माण करून सदर ठिकाणाहून अंधार व गोंधळाचा फायदा घेऊन पळून जाण्यात यशस्वी झाला.
सदर ठिकाणाहुन कारवाई दरम्यान आयशर टेम्पो, बोलेरो पिकअप जीप, फॉरच्युनर कार या वाहनांमध्ये २८,९३,८८०/- रुपये किंमतीचा मानवी जिवितास हानिकारक असलेला व महाराष्ट्र शासनाने राज्यात प्रतिबंधित केलेला वेगवेगळ्या प्रकाराचा पानमसाला व तंबाखू (सुगंधीत) असा मालाचा साठा व त्यासाठी वापरण्यात आलेली वाहने फॉरच्युनर कारमध्ये मिळून आलेली रोख रक्कम, एक देशी बनावटीचे पिस्तुल, मोबाईल फोन व इतर सुमारे ७९,००,८८०/- रुपयांचा मुद्देमाल हस्तगत करण्यात आला असून त्याबाबत वाशी पोलीस ठाणे गु.र.नं ३२३/२०२१ भा.द.वि कलम ३०७, ३५३, १८८, २७२, २७३, ३२८, ३४ सह अन्नसुरक्षा कायदा कलम २६ (२)(I), २६ (२)(IV), २७ (३)(D), २७ (३)(E) भारतीय हत्यार कायदा कलम ३, २५, महाराष्ट्र पोलीस अधिनियम कलम ३७(१), (३)/१३५ प्रमाणे गुन्हा नोंद करण्यात आला आहे. सदर गुन्ह्यातील ०५ आरोपींना दि.१८/०९/२०२१ रोजी ०१:३४ वा. अटक करण्यात आली असून त्यांना दि.२३/०९/२०२१ पर्यंत पोलीस कोठडी सुनावण्यात आली आहे.
