संपादक: मोईन सय्यद/पालघर, प्रतिनिधी
पालघर- जिल्हा परिषद अध्यक्ष व उपाध्यक्षाच्या निवडणुकीत राजकीय दबावाखाली जिल्हा परिषद सदस्यांना दिवसभर बाहेर बसवून ठेऊन भेटण्याची वेळ न दिल्याने सदस्यांनी जिल्हाधिकारी कार्यालया समोर ठिय्या आंदोलन केले तर आमदार सुनिल भुसारा व जिल्हा परिषद सदस्यांनी जिल्हाधिकारी दलनातच तुफान राडा केला.
येत्या २० जुलै रोजी पालघर जिल्हा परिषदेच्या अध्यक्ष व उपाध्यक्ष पदासाठी निवडणुक जाहीर झाली असून या निवडणुकीसाठी राष्ट्रवादी पक्षाकडून राष्ट्रवादी- ६ व राष्ट्रीय काँग्रेस- १ असा ७ सदस्यांचा जिल्हा परिषद पालघर विकास आघाडी गट स्थापन करून मान्यतेसाठी जिल्हाधिकारी यांच्याकडे गट स्थापनेचा प्रस्ताव सादर करताना जिल्हाधिकारी हे राजकीय दबावाखाली २ महिला सदस्य व ५ पुरुष सदस्य यांना जाणूनबुजून वेळ देत नसल्याचा आरोप जिल्हा परिषद सदस्यांनी केली आहे.
गट स्थापन करण्यासाठी ज्ञानेश्वर सांबरे, शीतल धोडी, संदेश ढोणे, गणेश कासट, मंदा घरत, देवानंद शिंगाडे, शैलेश करमोडा हे सात सदस्य सोमवारी म्हणजेच दोन दिवस आगोदर जिल्हाधिकारी यांच्याकडे भेटायला आले परंतु जिल्हाधिकारी दिल्लीला गेल्याने सदस्यांना जिल्याधिकारी यांना भेटता आले नसल्याने पुन्हा बुधवारी सकाळी आगोदर ११ ची वेळ देण्यात आली नंतर दुपारी १ व नंतर दुपारी ३ अशा वेळा दिल्या. त्यामुळे जिल्हाधिकारी राजकीय दबावाखाली वेळकाढूपणा करत असल्याचा आरोप जिल्हा परिषद सदस्यांनी केला. त्यानंतर जिल्हाधिकारी यांच्या कार्यालयाबाहेर हे सर्व सदस्य बसून असताना इतर लोकं भेटून जात होते परंतु जिल्हयाच्या लोकप्रतिनिधींना वेळ द्यायला यांच्याकडे वेळ नसल्याचे सांगून जिल्हा परिषद सदस्यांनी सदस्यांनी नाराजी व्यक्त केली.
काही वेळाने जिल्हाधिकारी हे सदस्यांना भेट न देता तसेच निघून गेल्याने उपस्थित सदस्यांनी जिल्हाधिकारी दालनाच्या समोरच खाली बसून भेट मिळण्यासाठी आंदोलन सुरू केले.
या सर्व प्रकारामागे राजकीय दबाव आसल्याचे सांगत जिल्हाधिकारी नक्की प्रशासन चालवतात की जिल्ह्याचे राजकारण? असा आरोप जिल्हा परिषद सदस्य व उपस्थित नागरिकांनी केला आहे.
आमदार सुनील भुसारे आणि निलेश सांबरे समर्थकांत बाचाबाची!
काही वेळात या ठिकाणी जिल्हाध्यक्ष आमदार सुनिल भुसारा व त्यांचे समर्थक तिथे येऊन महिला सदस्य मंदा घरत यांना बळजबरीने घेऊन जाण्याचा प्रयत्न करू लागले व इतर सदस्यांना दमदाटी व धक्काबुक्की केली विशेष म्हणजे हा प्रकार अप्पर जिल्हाधिकारी नवले यांच्या समोर जिल्हाधिकारी यांच्या दालनात झाला आहे.
