संपादक: मोईन सय्यद / भाईंदर, प्रतिनिधी:
भाईंदर पूर्व येथील गोडदेव गावातील ओम ब्रह्मदेव मास्टर्स क्रिकेट मंडळाकडून भव्य रक्तदान शिबिरांचे आयोजन करून तब्बल रक्ताच्या १०८ पिशव्या गोळ्या केल्या आहेत. महत्वाची बाब म्हणजे देवींची जत्रा रद्द करून इतक्या मोठ्या प्रमाणात रक्त जमा करण्यात आल्यामुळे ग्रामस्थांवर कौतुकाचा वर्षाव होत आहे.
भाईंदर पूर्व परिसरातील गोडदेव परिसरात गावदेवी मातेचे जागरूक देवस्थान आहे. दरवर्षी मे महिन्यात या गावात देवींची यात्रा भरवण्यात येते. मात्र गेल्या दोन वर्षांपासून देशात करोनाचे संकट असल्यामुळे सांस्कृतिक आणि सार्वजनिक कार्यक्रमाचे आयोजन करण्यात बंदी घालण्यात आली आहे.
कोरोना महामारीच्या संकटामुळे या वर्षी देखील देवींची यात्रा रद्द करण्याचा निर्णय येथील ग्रामस्थांनी घेतला होता. मात्र राज्यात गंभीर प्रमाणात रक्ताचा तुटवडा भासत असल्यामुळे यंदा क्रिकेट मंडळाकडून रक्त दान शिबिराचे आयोजन करण्यात आले होते. विशेष बाब म्हणजे या रक्तदान शिबीराकरिता या क्रिकेट पटूंनी पुढाकार घेतला होता. त्यात तब्बल पुरुष आणि महिलांनी मिळून तब्बल १०८ रक्त पिशव्या जमा केल्या आहेत. या शिबिराचे आयोजित महेश म्हात्रे यांच्या कडून करण्यात आले.
