संपादक: मोईन सय्यद/प्रतिनिधी: अवधुत सावंत
मिरा भाईंदर महानगरपालिका हद्दीतील भाईंदर पुर्व येथील सर्वे क्र. ६६३ आणि ६६४ या भूखंडावरील गैरव्यवहाराबाबत पाच वर्षांपूर्वी ठाणे नगर पोलीस ठाण्यात २६ नोव्हेंबर २०१६ रोजी गुन्हा दाखल करण्यात आला होता. युएलसीचे बिगरशेती बनावट कागदपत्र बनवून कसल्याही कोर्ट फी, स्टॅम्प ड्युटी, आवक जावक नोंदीशिवाय सरकारी अधिकाऱ्यांना हाताशी धरून बांधकामे करताना या बिल्डरांनी सरकारचा अब्जावधींचा महसूल बुडवला होता.
या कोट्यवधींच्या यूएलसी घोटाळ्यातील मुख्य आरोपी असलेल्या मिरा भाईंदर महानगरपालिकेत नगररचना विभागात कार्यरत असलेला सहाय्यक नगर रचनाकार दिलीप घेवरे याला आज सकाळी गुजरातच्या सुरत येथे ठाणे गुन्हे शाखेने अटक केली. दिलीप घेवारे गेल्या दोन आठवड्यांपासून फरार होता आणि अटकपूर्व जामिन मिळविण्यासाठी त्याचे आटोकाट प्रयत्न चालू होते. आज त्याच्या अटकपूर्व जामिनाची सुनावणी सत्र न्यायालयात ठेवण्यात आली होती मात्र सुनावण्यापूर्वीच त्याला गुन्हे शाखा ठाणे पोलिसांनी मोठ्या शिताफीने गुजरातमध्ये सुरत येथून अटक केली आहे.
