संपादक: मोईन सय्यद / प्रतिनिधी: अवधुत सावंत
रायगड मधील रोहा येथे सुरू होत असलेल्या महाराष्ट्र खो-खो असोसिएशनच्या मान्यतेने ‘रायगड जिल्हा खो-खो असोसिएशन’ आयोजित ४८ वी कुमार – मुली राज्य अजिंक्यपद व निवड चाचणी खो-खो स्पर्धा ८ ते ११ डिसेंबरला रोहा येथे होणार आहे. या स्पर्धेमध्ये राज्यातील सुमारे पावणेसातशे खेळाडू आणि पदाधिकारी, पंच व प्रशिक्षक मिळून दोनशेहून अधिक जणं उपस्थित राहणार आहेत.
सदर राज्य अजिंक्यपद व निवड चाचणी खो-खो स्पर्धा रोहा तालुक्यातील धाटाव-रोठ येथील परमपुज्य पांडुरंग शास्त्री आठवले औद्योगिक विद्यालय आणि एम. बी. मोरे फाडंडेशन महाविद्यालयाच्या क्रीडांगणावर होणार आहे. खासदार सुनिल तटकरे, माजी क्रीडामंत्री आदिती तटकरे, रायगड जिल्हा खो-खो असोसिएशनचे अध्यक्ष आमदार अनिकेत तटकरे, उपाध्यक्ष विजय मोरे, जिल्हा सचिव आशिष पाटील हे गेले पंधरा स्पर्धेची जय्यत तयारी करत आहेत.
स्पर्धेसाठी पाच मैदाने तयार करण्यात आली आहेत. सकाळ व दुपार सत्रात (रात्री प्रकाशझोतात) हे सामने होणार असून त्यासाठी फ्लडलाईटची व्यवस्था केली गेली आहे. चार दिवस चालणार्‍या या स्पर्धेला मुला-मुलींचे ४४ संघ, त्यांचे प्रशिक्षक, पंच व महाराष्ट्र खो-खो असोसिएशनचे पदाधिकारी उपस्थित राहणार आहेत. राज्याच्या कानाकोपर्‍यातून येणार्‍या संघांना स्पर्धेच्या ठिकाणी उपस्थितीसाठी ८ डिसेंबरला सकाळी ८ वाजेपर्यंतची मुदत दिली आहे. रेल्वेस्थानकावरुन संघांना निवासाच्या ठिकाणी पोच करण्यासाठी आणि निवासापासून मैदानावर ने-आण करण्यासाठी वाहतूक व्यवस्था आयोजकांकडून करण्यात आली आहे. या स्पर्धेचे उद्घाटन ८ तारखेला मा. माजी मंत्री आदित्यजी ठाकरे यांच्या हस्ते सायंकाळी होणार आहे. ही स्पर्धा यशस्वी करण्यासाठी रायगड जिल्हा खो-खो असोसिएशनचे पदाधिकारी आणि महाराष्ट्र खो-खो असोसिएशनेचे सर्व पदाधिकारी मेहनत घेत आहेत.
