मिरा भाईंदर प्रतिनिधी : गेल्या काही दिवसां पासून गुन्हे शाखा क्र. १ काशिमीरा यांचेकडून प्रतिबंधित गुटखा साठवणूक करणारे आणि विक्रेत्यांवर धडक कारवाई केली जात असून लाखोंचा प्रतिबंधित गुटखा आणि सुगंधित तंबाखूजन्य पदार्थ जप्त करण्यात आले आहे. अशाच प्रकारची मोठी कारवाई गुन्हे शाखेच्या युनिट क्र. १ यांचेकडून करण्यात आली असून शुक्रवार १९ मार्च रोजी पोलीस नाईक पुष्पेंद्र थापा यांना मिळालेल्या गुप्त माहितीच्या आधारे भाईंदर पश्चिमेकडील जलाराम जनरल स्टोर्स या दुकानावर छापा टाकून ९,८८,१३२ रुपये किमतीचा प्रतिबंधित गुटखा जप्त करण्यात आला आहे. त्याच प्रमाणे भाईंदर पश्चिमेलाच गणेश देओल नगर या झोपडपट्टीत सार्वजनिक सौचालायाच्या बाजूला असलेल्या एका खोलीमध्ये साठवून ठेवलेला प्रतिबंधित गुटखा, पान मसाला व सुगंधित तंबाखू असा एकूण ५,८१,१४४ रुपये किमतीचा माल जप्त करण्यात आला आहे.
काशिमीरा गुन्हे शाखा युनिट क्र. १ अशा प्रकारे धडक कारवाई करत एकाच दिवसात एकूण १५,६९,२७६ रुपये किमतीचा माल जप्त केला असून भाईंदर पोलीस ठाण्यात अनुक्रमे गुन्हा नोंद क्र. ११२/२०२१ भादवीस कलम ३२८, १८८,२७३ अन्न सुरक्षा अधिनियम २००६ चे कलम २६(२) (४), ३०(२)(ए) आणि त्याच ठिकाणी गुन्हा नोंद क्र. ११३/२०२१ भादवीस कलम ३२८, १८८,२७३ अन्न सुरक्षा अधिनियम २००६ चे कलम २६(२) (४), ३०(२)(ए) नुसार गुन्हा दाखल करण्यात आला आहे.
या कारवाईमध्ये गुन्हे शाखेचे पोलीस उपायुक्त डॉ. महेश पाटील यांच्या मार्गदर्शना खाली गुन्हे शाखा युनिट क्र. १ चे सहायक पोलीस आयुक्त रामचंद्र देशमुख व गुन्हे प्रकटीकरण शाखा क्र. १ चे पोलीस निरीक्षक अविराज कुराडे यांच्या सहकार्याने सहायक पोलीस निरीक्षक विलास कुटे, पोलीस उपनिरीक्षक हितेंद्र विचारे, सहा. पोलीस उपनिरीक्षक राजू तांबे, पोलीस हवालदार संदीप शिंदे, किशोर वाडिले, अविनाश गर्जे, पोलीस नाईक पुष्पेंद्र थापा, सचिन सावंत, विकास राजपूत व त्यांचे इतर सहकारी यांनी मिळून कारवाई केली असून या प्रकरणाचा पुढील तपास पोलीस उपनिरीक्षक बजरंग अडसूळ करीत आहेत.
मिरा भाईंदर शहरात गेल्या काही दिवसांपासून प्रतिबंधित गुटखा, पान मसाला त्याच बरोबर सुगंधित तंबाखू यांच्या वाहतुकीवर सतत कारवाया केल्या जात असून आता पर्यंत कोट्यवधींचा माल जप्त केला गेला आहे तरी देखील मात्र या प्रतिबंधित मालाची चोरटी वाहतूक आणि साठवणूक काही कमी होताना दिसत नाही. अशा प्रकारच्या प्रतिबंधित मालावर कशा प्रकारे नियंत्रण आणले जाईल हाच एक मोठा प्रश्न पोलिसांसमोर उभा राहिलेला आहे.
