संपादक: मोईन सय्यद / प्रतिनिधी: अवधुत सावंत
डोंबिवलीतील ‘एमआयडीसी’ या औद्योगिक क्षेत्रातील अस्वच्छता आणि बकाल परीसर असल्याचा डाग आता पुसला जाणार आहे. यासाठी कल्याण-डोंबिवली महापालिकेने एक अभिनव संकल्प अभियान नव्या वर्षापासून राबविण्यास सुरुवात केली आहे. या अभियाना अंतर्गत परिसरातील रस्ते स्वच्छ होणार असून, रस्त्याच्या दुतर्फा फुलझाडे बहरणार आहेत. यासाठी येथील उद्योजक संघटना, औद्योगिक परिसरातील संस्था यांचे सहाय्य घेण्यात येईल असे पालिकेचे घनकचरा विभागाचे उपायुक्त अतुल पाटील यांनी सांगितले. या भागास भेट दिल्यानंतर त्यांनी या अभियानाची माहिती दिली.
कल्याण-डोंबिवली महापालिकेचे आयुक्त डॉ.भाऊसाहेब दांगडे आणि अतिरिक्त आयुक्त मंगेश चितळे यांच्या मार्गदर्शनाखाली डोंबिवली येथील एमआयडीसी फेज मधील नवीन वर्षाची सुरुवात स्वच्छता मोहिमेने करण्यात आली आहे. या स्वच्छता मोहिमे अंतर्गत संजय नगर – अभिनव शाळा हा रस्ता प्रामुख्याने सफाई साठी हाती घेण्यात आला आहे. प्रमोशन लॉज, साई पूजा लॉज, गणेश भुवन हॉटेल, संजय नगर जुना डम्पिंग ग्राउंड या भागात स्वच्छता अभियान मोहीम राबविण्यात येत आहे.
या विशेष स्वच्छता मोहिमेसाठी जेसीबी आणि डंपर उपलब्ध केलेले आहेत. एक जानेवारीपासून या भागामध्ये विशेष मोहीम राबविण्याचे योजना महापालिकेच्या वतीने करण्यात आली आहे. याबाबत घनकचरा विभागाचे उपायुक्त अतुल पाटील यांनी सांगितले कि, डोंबिवली औद्योगिक परिसरातील फेज एक आणि फेज दोन मध्ये मोठ्या प्रमाणात कचरा साठल्याच्या तक्रारी येत आहेत त्यामुळे एक जानेवारीपासून येथे विशेष मोहीम पालिकेच्या वतीने राबविण्याचा निर्णय घेण्यात आला त्यासाठी स्वतंत्र जेसीबी, डंपर उपलब्ध करून देण्यात आले. एमआयडीसी परिसरात सुमारे साडेपाचशे औद्योगिक कारखाने आहेत. त्या कारखान्यांना आणि येथील नागरिकांना आवाहन करण्यात येत आहे की, कोणीही रस्त्यावर कचरा टाकू नये. आपला परिसर स्वच्छ राहावा यासाठी महापालिकेला सहकार्य करावे, असे संस्था संघटनांना आवाहन आहे. या परिसरातील स्वच्छते सोबत रस्ते सुशोभित करणे गरजेचे आहे फुलझाडे, ग्रीन बेल्ट रस्त्याच्या किनाऱ्याला करण्याची योजना आहे. ‘कामा’ संघटनेला सुद्धा महापालिकेला सहकार्य करण्याचे आवाहन करण्यात येत आहे. येथे अनेक कारखाने असल्यामुळे महापालिकेची स्वतंत्र यंत्रणा उभारणे गरजेचे आहे.
सहाय्यक आयुक्त भरत पवार, उपमुख्य स्वच्छता अधिकारी वसंत देगलूरकर, स्वच्छता अधिकारी संदीप किस्मतराव, तसेच स्वच्छता निरीक्षक जयंत गाडे, अनिकेत धोत्रे आणि पालिकेचे कर्मचारी यांच्या प्रयत्नामुळे साफसफाई चे काम जोमाने सुरू आहे. ‘कामा’ या उद्योजकांच्या संघटनेचे कार्याध्यक्ष देवेन सोनी यांची पालिका अधिकाऱ्यांनी भेट घेतल्यानंतर पालिकेकडून अधिकृत पत्र प्राप्त झाल्यानंतर, ‘कामा’ संघटनेच्या वतीने पालिकेला पूर्ण सहकार्य केले जाईल असे कार्याध्यक्ष देवेन सोनी यांनी सांगितले, मात्र स्वच्छता अभियान पूर्ण झाल्यानंतर पालिकेने देखभालीची जबाबदारी पूर्ण करावी अशी अट ‘कामा’ संघटनेच्या वतीने घालण्यात येणार असल्याचे कार्याध्यक्ष देवेन सोनी यांनी प्रसिद्धी माध्यमांना सांगितले.
