मिलन शाह, लोणी काळभोर : पुणे-सोलापूर महामार्गावर लोणी काळभोर येथील मनाली हॉटेलसमोर सकाळी आठच्या सुमारास एका खासगी बसला आग लागली. चालकाच्या समयसुचकतेमुळे सर्व प्रवाशांना सुरक्षितपणे खाली उतरविण्यात आल्यामुळे मोठा अनर्थ टळला. दरम्यान पुणे महापालिका आणि पुणे महानगर प्रदेश विकास प्राधिकरण (पीएमआरडीए) च्या अग्निशमन दलांच्या जवानांनी तातडीने आग विझवली.
सकाळी सोलापूरच्या दिशेने सुसाट जाणाऱ्या खासगी प्रवासी बसमध्ये अचानक आग लागल्याचे निदर्शनास आले. बर्निंग बसचा हा थरार पाहून परिरातील ग्रामस्थ आणि बसमधील प्रवाशांची एकच धावपळ सुरू झाली. चालक आणि वाहकांनी स्थानिक नागरिकांच्या मदतीने तातडीने सर्व प्रवाशांना सुखरुपपणे बाहेर उतरवले.
नागरिकांनी तातडीने अग्निशमन विभागाला कळविल्यानंतर १५ ते २० मिनीटांमध्ये पुणे महापालिका आणि पीएमआरडीएच्या अग्निशमन दलाच्या दोन गाड्या घटनास्थळी आल्या. त्यांनी पाण्याचा मारा करत एका तासात आग विझवली. या दरम्यान पुणे-सोलापूर महामार्गावरील वाहतूक काही वेळ थांबविण्यात आली होती.
