मिरा भाईंदर, प्रतिनिधी: मिरा भाईंदर शहरातील मराठा समाजाच्या अनेक वर्षांपासून प्रलंबित असलेल्या मागणीला अखेर यश आले असून महानगरपालिका कार्यक्षेत्रात छत्रपती शिवाजी महाराजांचे तेरावे वंशज व माजी राज्यसभा सदस्य युवराज संभाजी राजे छत्रपती यांच्या शुभहस्ते घोडबंदर किल्ला बुरुजावरील 100 फूटी भगवा ध्वज व पांडुरंग वाडी येथे नरवीर तानाजी मालुसरे मराठा भवन भूमिपूजन सोहळा संपन्न झाला.
मिरा-भाईंदर महानगरपालिका आयुक्त दिलीप ढोले यांच्या मार्गदर्शनाखाली 15 ऑक्टोबर रोजी गानसम्राज्ञी स्व. लता मंगेशकर नाट्यगृह येथे आयोजित केलेल्या भव्य अशा कार्यक्रमात युवराज संभाजी राजे छत्रपती यांच्या हस्ते, केंद्रीय मंत्री कपिल पाटील, पालकमंत्री शंभूराज देसाई, आमदार छत्रपती शिवेंद्र सिंह राजे भोसले, नितेश राणे, प्रताप सरनाईक, गीता जैन शिवसंग्रामचे अध्यक्ष स्व. विनायक मेटे यांच्या पत्नी ज्योतिताई मेटे, आयुक्त तथा प्रशासक दिलीप ढोले, डॉ. संभाजी पानपट्टे अतिरिक्त आयुक्त, अनिकेत मनोरकर अतिरिक्त आयुक्त, मिरा भाईंदरचे सुपुत्र शहीद मेजर कौस्तुभ राणे यांच्या माता ज्योती राणे व पिता प्रकाश राणे, मराठा समाजाचे अध्यक्ष सुरेश दळवी, मराठा समाज संघाचे पदाधिकारी, महानगरपालिका सर्व अधिकारी व कर्मचारी मोठया संख्येने उपस्थित होते.
या कार्यक्रमात सर्वप्रथम युवराज संभाजी राजे छत्रपती यांच्या शुभहस्ते घोडबंदर किल्याच्या बुरुजावरून 100 फुटी ध्वजाचे भूमिपूजन करण्यात आले त्यानंतर पांडुरंग वाडी येथील नरवीर तानाजी मालुसरे मराठा भवन भूमिपूजन सोहळा संपन्न झाला.
मराठा भवनाच्या भूमीपूजनाचा कार्यक्रम झाल्यानंतर सर्व मान्यवरांनी भारतरत्न गानसम्राज्ञी लता मंगेशकर नाट्यगृह इथे उपस्थित राहून महाराष्ट्र राज्याचे आराध्य दैवत छत्रपति शिवाजी महाराज यांच्या पुतळ्यास पुष्पहार अर्पण करून मानवंदना दिली. सर्व मान्यवरांच्या उपस्थितीत कलाकारांनी आपली कला सादर करून छत्रपती शिवाजी महाराजांच्या शौर्य कथांची गाथा पोवड्यातून सादर केली. सांस्कृतिक कार्यक्रम समाप्तीनंतर बारवी धरणातील 210 धरणग्रस्त कुटुंबियांच्या सदस्यांना महापालिकेच्या सेवेत समाविष्ट करून घेण्यासाठी त्यांना मान्यवरांच्या शुभहस्ते नियुक्तीपत्र देण्यात आले.
सदर प्रसंगी सर्व मान्यवर, पोलीस प्रशासन, स्थानिक लोकप्रतिनिधी, माजी नगरसेवक, उपस्थित नागरिक, उपस्थित सर्व पत्रकार बंधू, प्रिंट मीडिया, इलेक्ट्रॉनिक मीडिया यांनी वेळात वेळ काढून घोडबंदर किल्ला 100 फूटी ध्वज व नरवीर तानाजी मालुसरे मराठा भवन भूमिपूजन सोहळ्यास उपस्थित राहिल्याबद्दल मिरा-भाईंदर महानगरपालिकेचे आयुक्त तथा प्रशासक दिलीप ढोले यांनी सर्वांचे आभार व्यक्त केले.
