संपादक: मोईन सय्यद / प्रतिनिधी: अवधुत सावंत
एअर इंडियामध्ये डेप्युटी चीफ एअर क्राफ्ट इंजिनिअर या पदावर कार्यरत असलेले अजित जनार्दन पाटील यांचा युद्धजन्य युक्रेनमधून भारतीय विद्यार्थ्यांना मायदेशी परत आणण्यात मोलाचा वाटा आहे. विद्यार्थ्यांच्या सुखरूप सुटकेसाठी गेल्या आठवड्यापासून तीन वेळा ते एअर इंडियाच्या विमानातून बुडापेस्ट, रूमानिया इथे जाऊन आले. आतापर्यंत सुमारे ९०० ते १००० भारतीय विद्यार्थ्यांना परत आणण्याच्या कामात ते सहभागी होते.
भारत सरकारमधील अतिमहत्त्वाच्या व्यक्ती जेव्हा परदेश प्रवासाला जातात तेव्हा त्या विमानाच्या देखभालीची जबाबदारी प्रामुख्याने या विभागातील उच्चपदस्थ अधिकाऱ्यांवर असते. अजित पाटील यांच्यावर आतापर्यंत अनेक अतिमहत्त्वाच्या व्यक्तींच्या प्रवासाची जबाबदारी सोपवण्यात आली आहे. यामध्ये भारताचे राष्ट्रपती, पंतप्रधान अशा पदावरील व्यक्तींचा समावेश आहे.
डेप्युटी चीफ एअर क्राफ्ट इंजिनिअर अजित जनार्दन पाटील
रशिया – युक्रेन यांच्यादरम्यान भडकलेल्या युद्धात हजारो भारतीय विद्यार्थी युक्रेन इथे अडकून पडले आहेत. या अतिशय जोखमीच्या ऑपरेशनसाठी विद्यार्थ्यांना आणणा-या विमानाबरोबर जाण्याची तयारी अजित पाटील यांनी दर्शवली.
मूळचे जळगावचे असलेले अजित पाटील त्यांच्या बालपणापासून डोंबिवलीकर असून, येथील धनाजी नाना चौधरी (डीएनसी) बहुद्देशीय विद्यालयाचे माजी विद्यार्थी आहेत. आपल्या मित्रांशी यासंदर्भात बोलताना ते म्हणाले, की “हे कोणा एकट्याचे काम नाही. मी या ऑपरेशन टीमचा एक भाग आहे. टीम म्हणून आम्ही आमची जबाबदारी उत्तम रितीने पार पाडत आहोत, त्यातून आपल्या देशाची प्रतिमा जगभरात उंचावण्यात हातभार लागत आहे याचा आनंद आणि अभिमान आहे. माझ्या कामाने मला देशासाठी योगदान देण्याची संधी मिळाली म्हणून मी एअर इंडियाप्रती अतिशय कृतज्ञ आहे. युक्रेनहून आलेल्या या मुलांमध्ये मला माझ्या तरूण मुलांचे चेहरे दिसत होते. त्यामुळे त्यांच्या पालकांची अस्वस्थता, घालमेल मी समजू शकत होतो. या विद्यार्थ्यांना भारतीय दूतावासाच्या माध्यमातून रूमानिया आणि हंगेरी जवळच्या विमानतळावर बोलावून घेतले. तिथवर पोचण्यासाठीही अनेक मुलांना दिव्यातून जावे लागले. मात्र जेव्हा ते विमानात बसले तेव्हा त्यांच्यासह आम्हां सर्वांनाच झालेला आनंद हा शब्दांपलिकडचा आहे.”
आज संध्याकाळी चौथ्यांदा ते या कामगिरीसाठी रूमानियाला रवाना होत आहेत.
