संपादक: मोईन सय्यद / प्रतिनिधी: अवधुत सावंत
स्टॉकहोम येथे जगातील सर्वात प्रतिष्ठेच्या पुरस्कारांपैकी एक असलेल्या नोबेल पारितोषिकापैकी यावर्षीचा अर्थशास्त्राचा नोबेल पुरस्कार आज जाहीर करण्यात आला. गेल्या आठवडाभरापासून विविध विषयांवरील नोबेल पुरस्कार जाहीर करण्यात आले.
२०२२ च्या अर्थशास्त्रातील नोबेल पुरस्कारासाठी अमेरिकी अर्थतज्ज्ञ बेन बर्नांक, डग्लस डायमंड आणि फिलिप डिबिविग यांना विभागून देण्यात आला आहे. आर्थिक मंदीच्या काळात बँकिंग क्षेत्र सुधारण्यासाठी या तिघांनी संशोधन केले आणि आर्थिक समस्येतून बाहेर पडण्यासाठी चांगले पर्याय सूचवले होते. याची दखल घेत आज या तिघांना अर्थशास्त्रातील नोबेल पुरस्कार देऊन सन्मानित करण्यात आले आहे.
यावर्षी विविध विषयांसाठी जाहीर झालेले नोबेल पुरस्कार
वैद्यकशास्त्र – स्वंते पाबो (स्वीडन)
भौतिकशास्त्र – एलेन आस्पेक्ट (फ्रान्स), जॉन एफ क्लॉजर (अमेरिका) आणि अँटोन जेलिंगर (ऑस्ट्रिया)
रसायनशास्त्र – कॅरोलिन बरटोजी (अमेरिका, स्टॅनफोर्ड विद्यापीठ), मॉर्टेन मीएलडोल (कोपनहेगन – डेनमार्क विद्यापीठ), के. के बॅरी शार्पलेस (स्क्रिप्स रिसर्च सेंटर – अमेरिका)
साहित्य – अॅनी अर्नो (फ्रान्स)
शांतता – एलेस बियालियात्स्की (मानवाधिकार वकिल – बेलारूस), मेमोरियल (रशियन मानवाधिकार संघटना) आणि सेंटर फॉर सिव्हिल लिबर्टीज (युक्रेनियन मानवाधिकार संघटना )
नोबेल पुरस्कार हा जगातील सर्वात मोठा पुरस्कार मानला जातो. याची सुरुवात १९०१ मध्ये झाली आणि अल्फ्रेड नोबेलच्या नावावरून हे नाव देण्यात आले. अल्फ्रेड नोबेल स्वीडनचा रहिवासी होता. त्याने डायनामाइटचा शोध लावला होता.
नोबेल पारितोषिके भौतिकशास्त्र, रसायनशास्त्र, शरीरविज्ञान किंवा औषध, साहित्य आणि शांती या क्षेत्रातील उल्लेखनीय कामांसाठी दिली जातात.