भाईंदर, प्रतिनिधी : भाईंदर पश्चिमेकडील भोला नगरमध्ये एका चार वर्षांच्या मुलीचे बसमधून अपहरण तिच्यावर बलात्कार केल्याची घटना उघडकीस आली असून आरोपीने पीडित मुलीवर लैंगिक अत्याचार करून तिला ठार मारण्याच्या उद्देशाने एका पोत्यामध्ये बांधून रस्त्याच्या कडेला फेकून दिले. मात्र पोलिसांनी अत्यंत्य जलदगतीने तपासाची सुत्रे फिरवून नराधमाला बेड्या ठोकल्या आहेत. पीडित मुलगी सध्या जिवंत असली तरी तरी तिची प्रकृती गंभीर असल्यामुळे पुढील उपचारा करिता तिला मुंबईच्या नायर रुग्णालयात हलविण्यात आले आहे.
या संदर्भात भाईंदर विभागाचे सहाय्यक पोलीस आयुक्त शशिकांत भोसले यांनी दिलेल्या माहिती नुसार एका नराधम बस चालकाने भाईंदर पश्चिमे कडील भोला नगर येथे राहणाऱ्या चार वर्षांच्या मुलीचे अपहरण करत आधी तिच्यावर लैंगिक अत्याचार केले आणि यानंतर तिला जीवे ठार मारण्याच्या उद्देशाने वसईच्या वालीव पोलीस ठाण्याच्या हद्दीत या मुलीला गोणीत बांधून फेकले.
मुलीच्या कुटुंबातील सदस्यांच्या तक्रारीवरून भाईंदर पोलिसांनी चार तासात आरोपी बस चालकाला वसईतून अटक केली आहे. या घटनेत चिमुकलीचा जीव वाचला असला तरी तिची प्रकृती गंभीर असून पुढील उपचारासाठी तिला मुंबईतील सरकारी रुग्णालयात दाखल करण्यात आले आहे. रविवारी सायंकाळी मुलीचे अपहरण झाल्यानंतर कुटुंबीयांनी तक्रार दाखल केली होती.
भाईंदर पश्चिमे कडील भोला नगर येथे झोपडपट्टीतील लहान मुलं रविवारी दुपारी एकच्या सुमारास घरा समोर उभ्या असलेल्या लक्झरी बसमध्ये खेळत होती काही वेळाने हि बस निघून गेली. त्यावेळी सर्वजण बसमधून खाली उतरले मात्र चार वर्षांची चिमुकली गायब असल्याचे दिसल्याने तिच्या पालकांनी पोलीस ठाणे गाठले. यानंतर भाईंदर पोलिसांनी जलदगतीने आपल्या तपासाची सूत्रे हलवत बस चालकाचा शोध लावला. यावेळी आरोपी बसचालक वसई माणिकपूर येथे असल्याची माहिती मिळाली.
पोलिसांनी शिताफीने आरोपीला अटक केल्यानंतर धक्कादायक खुलासा झाला. बसमध्येच लैंगिक अत्याचार करून चार वर्षाच्या चिमुकलीचा गळा आवळून जीवे मारण्याचा प्रयत्न केल्याचे तपासात उघड झाले. तसेच प्लास्टिकच्या पोत्यात भरून वालीव पोलीस ठाण्याच्या हद्दीत रस्त्याच्या कडेला तिला फेकण्यात आल्याचे समजले. पोलिसांनी ताबडतोड घटनास्थळी धाव घेत शोध घेतला असता वालीव पोलिसांनी ही चिमुकली जखमी अवस्थेत आढळून आली. त्यानंतर पीडित मुलीला तात्काळ प्राथमिक उपचार करून पुढील उपचारासाठी तिला मुंबईतील नायर रुग्णालयात दाखल केलं आहे.
पोलिसांनी आरोपीला अटक करून न्यायालयात हजार केल्यानंतर त्याला 28 डिसेंबरपर्यंत पोलीस कोठडी देण्यात आली असून पुढील तपास सुरू असल्याची माहिती भाईंदर विभागाचे सहाय्यक पोलीस आयुक्त शशिकांत भोसले सांगितले. एका चार वर्षाच्या चिमुकल्या मुलीवर हा दुर्दैवी प्रसंग घडल्याने मिरा भाईंदर शहरातील लहान मुलांच्या सुरक्षेचा प्रश्न पुन्हा एकदा ऐरणीवर आला आहे.
