संपादक: मोईन सय्यद / प्रतिनिधी: अवधुत सावंत
नवी मुंबई – तुर्भे येथील व्यापाऱ्यास लुटण्याकरीता जाणाऱ्या एका इसमास देशी बनावटीचे पिस्टल व ५ जिवंत काडतूसासह एपीएमसी पोलिसांनी अटक केली आहे.
याबाबत हाती आलेले वृत्त असे आहे कि, माउली सिरॅमिक कंपनी जवळ, बँक ऑफ इंडिया रोड, सेक्टर २३, तुर्भे, नवी मुंबई येथे एक इसम अग्निशत्र घेऊन येणार असल्याची माहिती एपीएमसी
पोलिसांना मिळाली होती.
सदर मिळालेल्या माहितीच्या अनुषंगाने पोलिसांनी सदर ठिकाणी सापळा रचून त्या इसमास अटक केली. त्याच्याजवळ १ देशी बनावटीचे पिस्टल व ५ जिवंत काडतूसे बेकायदेशीर मिळून आले. सदर देशी बनावटीचे पिस्टल व ५ जिवंत काडतूसे जप्त करून सदर प्रकरणी त्याच्याविरुद्ध एपीएमसी पोलीस ठाण्यात गुन्हा दाखल करण्यात आला आहे.
त्याच्याकडे केलेल्या चौकशीत सदर ठिकाणी एका व्यापाऱ्यास पिस्टलचा धाक दाखवून त्याच्या कंपनीमध्ये चोरी करण्याच्या उद्देशाने आला असल्याचे त्याने सांगितले.
अटक इसमाकडून एकूण ५२, ५००/- रुपयांचा मुद्देमाल जप्त करण्यात आला आहे.
