संपादक: मोईन सय्यद / प्रतिनिधी: अवधुत सावंत
पुणे येथे २० ऑगस्ट २०२२ रोजी मराठी साहित्य संमेलनाचे माजी अध्यक्ष श्री. श्रीपाल सबनीस यांच्या हस्ते श्री. उदय देशमुख यांच्या चित्रांच्या प्रदर्शनाचे तसेच श्रीपाल लालवाणी यांनी संकलित केलेल्या २०१३ ते २०२२ या कालावधीतील शहीद डॉ. नरेंद्र दाभोलकर यांच्या संबंधातील वृत्तपत्रातील कात्रणांच्या प्रदर्शनाचे उद्घाटन संपन्न झाले.
घोले रोड, शिवाजीनगर पुणे येथील राजा रविवर्मा कलादालनात हे चित्र प्रदर्शन २० ते २२ ऑगस्ट पर्यंत हे प्रदर्शन सर्व नागरिकांसाठी खुले राहणार होते. या वार्ता संकलन व चित्र प्रदर्शनीच्या उद्घाटन प्रसंगी राज्य कार्यकारणी सदस्य मुक्ता दाभोलकर, श्री. मिलिंद देशमुख, नंदिनी जाधव तसेच अंधश्रद्धा निर्मूलन समिती, महाराष्ट्र ट्रस्टचे विश्वस्त श्री. गणेश चिंचोले हे आवर्जून उपस्थित होते.
सुप्रसिद्ध चित्रपट कलावंत, सयाजी शिंदे, सोनाली कुलकर्णी, प्रख्यात लेखक सदानंद मोरे आदी मान्यवरांनी या प्रदर्शनाला भेट दिली. पुर्वी चित्रकला शिक्षक असलेले आणि आता पूर्ण वेळ महाराष्ट्र अंधश्रद्धा निर्मूलन समितीचे पदाधिकारी असलेले डोंबिवली शाखेचे कार्याध्यक्ष श्री. उदय देशमुख यांनी ‘माणूस मारता येतो, विचार मारता येत नाही’ या थीमवर शहीद डॉ. नरेंद्र दाभोलकर, कॉम्रेड गोविंद पानसरे, प्राध्यापक कलबुर्गी, पत्रकार गौरी लंकेश यांच्या निर्घुण खूनावर आधारित अनेक चित्रे विविध माध्यमांचा वापर करून तयार केलीत. त्याला चांगला प्रतिसाद मिळाल्यानंतर समाज प्रबोधनाच्या चळवळीत काम करणाऱ्या सर्वच समाज सुधारकांचे पोट्रेट्स तयार केलीत. यामधे राजश्री शाहू महाराज, महात्मा ज्योतिबा फुले , भारतरत्न डॉ बाबासाहेब आंबेडकर, क्रांतीज्योती सावित्रीबाई फुले, बी प्रेमानंद, अब्राहम कोवूर, डॉ. एन डी पाटील, छत्रपती शिवाजी महाराज, यांच्यासह अनेकांची पोर्ट्रेटस् तयार केलीत.
आजपर्यंत त्यांच्या चित्रांची प्रदर्शनी ठाणे जिल्ह्यात महाराष्ट्र अंधश्रद्धा निर्मूलन समितीचे जिथे-जिथे कार्यक्रम झालेत त्या अनेक ठिकाणी तर भरवण्यात आलेच त्याचबरोबर पुणे, कोल्हापूर, महाबळेश्वर या ठिकाणी सुद्धा या प्रदर्शनाला प्रचंड प्रतिसाद मिळाला. अनेक मान्यवरांनी या चित्रांचं भरभरून कौतुक केलं. यातूनच या सर्व चित्रांची स्वतंत्र प्रदर्शनी भरवण्याची कल्पना समोर आली. या प्रदर्शनीसाठी चित्रकार उदय देशमुख यांना महाराष्ट्र अंधश्रद्धा निर्मूलन समितीचे विश्वस्त श्री गणेश चिंचोले यांचे मोलाचे मार्गदर्शन लाभले.
