संपादक: मोईन सय्यद / प्रतिनिधी: अवधुत सावंत
डोंबिवली येथील इंदिरा नगर वस्तीतील नागरिक मोबाईल तंत्राच्या अभावामुळे लसीकरणापासून मोठ्या संख्येने वंचित आहेत. कोरोनाचा संसर्ग होऊ नये यासाठी नागरिकांचे लसीकरण मोठ्या संख्येने होणे गरजेचे आहे. यासाठी रिपाईच्या (आठवले) डोंबिवली शहर शाखेच्या वतीने इंदिरा नगर येथील नागरिकांची लसीकरणासाठी नाव नोंदणी करण्यात येणार आहे.
अशी माहिती रिपब्लिकन पार्टी आँफ इंडियाचे डोंबिवली शहर अध्यक्ष अंकुश गायकवाड यांनी दिली आहे.
स्वच्छतेची कोणत्याही सोयीसुविधा नसताना कोरोना संसर्ग इंदिरा नगर मध्ये जाणवलेला नाही. परंतु येथे घरकाम करणारे, गवंडी, सुतार, प्लंबर, वायरमन, रिक्षाचालक, फेरिवाले, कचरावेचक
इत्यादी कष्टकरी समाज मोठ्या संख्येने राहत आहेत. दैनंदिन कामानिमित्त ते बाहेर पडत असल्याने बाहेरुन संसर्गाचा प्रसार वस्तीत होऊ शकतो. त्याचप्रमाणे येथील नागरिकांना कोरोनाची बाधा होऊ नये, त्यासाठी लसीकरण होणे गरजेचे आहे.
सरकारने लसीकरणाच्या नोंदणीसाठी ऑनलाईन
सोय जरी केली असली तरी त्यासाठी अँड्रॉईड मोबाईल असणे आवश्यक आहे. येथील अनेक नागरिकांकडे अश्या प्रकारचे मोबाईल नाहीत. तर अनेकांकडे मोबाईल असून नोंदणी करण्याचे मोबाईल मधील तंत्र अवगत नसल्याने येथील नागरिकांचे मोठ्या संख्येने अद्याप लसीकरण झालेले नाही. अशी माहिती रिपाईच्या कार्यकर्त्यांनी दिली आहे.
रिपाईच्या वतीने इंदिरा नगर येथे पक्ष कार्यालय सुरु आहे. या कार्यालयात १ मे पासून लसीकरण नोंदणी सुरु करण्यात आली आहे. दररोज सायंकाळी हि नोंदणी सुरु असते.
लस कुप्यांचा पुरेसा पुरवठा शासनाच्या वतीने होत नसल्याने कल्याण-डोंबिवली शहरातील लसीकरण केंद्रे बंद आहेत.परंतु हि लस केंद्र पुर्ववत होताच, नोंदणीकृत लाभार्थ्यांना मोबाईल लघुसंदेशाद्वारे (मेसेज) लस केंद्र कळविले जाईल अशी माहिती रिपाईच्या वतीने देण्यात आली आहे.
संपर्क – रिपाई वार्ड अध्यक्ष तेजस जोंधळे – ९९८७९७२४१४.
धम्मपाल सरकटे – ८६५२७२६८८४/९९२०९४६३७९
