मिरा भाईंदर: दिनांक 8 सप्टेंबर 2022 रोजी मिरा भाईंदर महानगरपालिका आयुक्त दिलीप ढोले यांच्या मार्गदर्शनानुसार कार्यकारी अभियंता शरद नानेगांवकर यांच्या अध्यक्षतेखाली मलनि:सारण विभागाची आढावा बैठक आयोजित करण्यात आली होती.
या बैठकीस मलनि:सारण विभागाचे उप-अभियंता अरविंद पाटील, दिपक जाधव, प्रफुल्ल वानखेडे आणि संबंधित ठेकेदार उपस्थित होते.
शहरातील सर्व मलनि:सारण केंद्राची माहिती, सद्यस्थितीतील परिस्थिती आणि पावसाळ्यानंतर सुरु करावयाची कामे याबाबतचा आढावा घेण्यासोबतच मलनि:सारण केंद्रातील भविष्यात करावयाच्या कामाची माहिती कार्यकारी अभियंता यांनी घेतली.
सफाईमित्र सुरक्षा चॅलेंज मधील असणाऱ्या विविध संकल्पना, विविध उपक्रम आणि त्या अनुषंगाने मलनि:सारण केंद्रामध्ये करावयाची कामांच्या दृष्टीने संबंधितांना तात्काळ सुचना देऊन पुढील आठवड्यात सर्व मलनि:सारण केंद्राचा पाहणी दौरा आयोजित करणार असून त्यावेळी सर्व कामांची प्रत्यक्ष पाहणी करणार आहे.
महानगरपालिकेचे सद्यस्थितीतील सफाईमित्र सुरक्षा स्पर्धेत स्थान उंचावण्यासाठी मलनि:सारण विभाग, आयुक्त दिलीप ढोले यांच्या मार्गदर्शनानुसार कार्य यशस्वी पुर्ण करेल असे कार्यकारी अभियंता शरद नानेगांवकर यांनी सांगितले.
