वन महोत्सव 2023 समारोप प्रसंगी अखिल भारतीय आतंकवाद विरोधी मोर्चा अध्यक्ष, मणींदरजित सिंह बिट्टा, आमदार प्रताप सरनाईक, आमदार गीता जैन यांची विशेष उपस्थिती लाभली तर
आयुक्त दिलीप ढोलेंनी मानले सर्वांचे आभार!
मिरा भाईंदर, प्रतिनिधी: मिरा भाईंदर महानगरपालिका आयुक्त तथा प्रशासक दिलीप ढोले यांच्या मार्गदर्शनाखाली महाराष्ट्र शासन “माझी वसुंधरा” अभियान अंतर्गत विविध उपक्रम राबविण्यात येत आहे. त्या पार्श्वभुमीवर “माझी वसुंधरा” अभियान अंतर्गत दिनांक 25, 26 व 27 फेब्रुवारी रोजी “वनमहोत्सव 2023” आयोजित करण्यात आला होता. दिनांक 27 फेब्रुवारी 2023 रोजी सदर वन महोत्सव 2023 समारोप प्रसंगी अखिल भारतीय आतंकवाद विरोधी मोर्चा अध्यक्ष, मणींदरजित सिंह बिट्टा, आमदार प्रताप सरनाईक, आमदार गीता जैन यांची विशेष उपस्थिती लाभली. वन महोत्सव 2023 मिरा भाईंदर शहरातील नागरिकांच्या सहकार्यामुळे यशस्वीरित्या संपन्न करण्यात आला.
पंचतत्वावर आधारित असलेल्या मूल्यांच्या माहितीची जनजागृती करणेकामी महानगरपालिकामार्फत वनमहोत्सव 2023 चे आयोजन करण्यात आले होते. या वनमहोत्सवात पर्यावरण व संस्कृती संवर्धनासाठी विविध प्रकारचे भव्य विक्री प्रदर्शन आयोजन करण्यात आले. सदर प्रदर्शनामध्ये औषधी वनस्पती, बी-बियाणे रोपे, नर्सरी, आयुर्वेदिक व सौंदर्य उत्पादने, हस्तकला व हॅण्डलुम उत्पादने, विविध प्रकारचे, अलंकार, खाद्यसंस्कृती, पर्यावरण संवर्धन प्रकल्प जसे की सोलार सेल्स, सोलार बॅटरी, EV चार्जिंग पॉइंट्स, रेन वॉटर हार्वेस्टिंग इत्यादी श्रेणीतील प्रदर्शन भरवण्यात आले होते.
तसेच 27 फेब्रुवारी 2023 म्हणजेच समारोपाच्या दिवशी मिरा भाईंदर महानगरपालिकेच्या शालेय विद्यार्थ्यांच्या सांस्कृतिक कार्यक्रमाने, चित्रकला स्पर्धा विजेता, सायक्लोथॉन विजेता क्रीडा महोत्सव 2023 मधील विजेत्यांना अखिल भारतीय आतंकवाद विरोधी मोर्चा अध्यक्ष, मणींदरजित सिंह बिट्टा, आमदार प्रताप सरनाईक, आमदार गीता जैन, आयुक्त तथा प्रशासक दिलीप ढोले यांच्या हस्ते पारितोषिक वितरणाचा कार्यक्रम संपन्न झाला.
मणींदरजित सिंह बिट्टा यांनी पर्यावरणाशी निगडित आयोजित केलेल्या “वनमहोत्सव 2023” या उपक्रमाचे व पर्यावरण संवर्धनासाठी नावीन्यपूर्ण उपक्रम महापालिकेच्या माध्यमातून सतत राबवत येत असल्याने मिरा-भाईंदर महापालिकाचे अभिनंदन व कौतुक त्यांनी केले. शहरातील नागरिकांनी पर्यावरण आणि निसर्ग याविषयी संवेदनशील बनणे, नैसर्गिक साधन संपत्तींचे संवर्धन करण्यासाठी मिरा भाईंदर महानगरपालिका आयोजित माझी वसुंधरा अभियान अंतर्गत “वनमहोत्सव 2023” मध्ये शहरातील जबाबदार नागरिक म्हणून सहभाग नोंदवल्यामुळे हा महोत्सव यशस्वीरित्या पार पडला यासाठी आयुक्त तथा प्रशासक दिलीप ढोले यांनी मिरा भाईंदर शहरवासीयांचे आभार व्यक्त केले.
