संपादक: मोईन सय्यद / प्रतिनिधी: अवधुत सावंत
‘ओला टॅक्सी’ चालकाच्या मारेकऱ्याला भिवंडी गुन्हे शाखा घटक-२ च्या पोलिसांकडून अटक करण्यात आलेली आहे.
इतर दोन आरोपी अजूनही फरार असून त्यांचा तपास सुरू आहे.
३१ जुलैच्या रात्री ११ वाजता माणकोली ब्रिज येथे एक ओला टॅक्सी चालकाचा खून करण्यात आल्याचे निदर्शनास आल्यापासून खळबळ उडाली होती. भिवंडी पोलीस या प्रकरणाचा तपस करत होते. मयत ‘ओला टॅक्सी’ चालकाचे नाव प्रभाकर गंजी (वय ४३ वर्षे) असून तो भिवंडीचाच राहणारा होता. अज्ञाताने गळा आवळून त्याचा खून केला होता.
भिवंडी गुन्हे शाखा घटक-२ च्या पोलिसांकडून तांत्रिक तपस केला असता यातील मुख्य आरोपी संतोष रेड्डी हा गायत्री नगर भागात राहत असल्याचे समजले. त्याला ताब्यात घेऊन चौकशी केली असता धक्कादायक माहिती समोर आली. मयताची पत्नी आणि तिची मैत्रीण तसेच ओळखीचा एक इसम नितेश वाला यांनी संगनमत करून संतोष रेड्डी याला प्रभाकरला मारण्याची सुपारी दिली असल्याचे कळले. यासाठी ४ लाखांपैकी एक लाख ऍडव्हान्स संतोष रेड्डी याला दिले गेले होते. याआधीही २७ जुलै ला प्रभाकरला मारण्यासाठी हे आरोपी गेले असता त्यांचा प्रयत्न फसला होता. यानंतर प्रभाकरच्या पत्नीने त्याच्या खुनासाठी संतोष रेड्डी यांच्याकडे तगादा लावल्याने त्याने ३१ जुलै रोजी प्रभाकरला फोन करून भाड्याने गाडी करून जाण्याच्या बहाण्याने गाडीत बसला आणि माणकोली ब्रिज वर गाडी थांबवून गळा आवळून प्रभाकरचा खून केला.
नंतर हे सर्व आरोपी फरार होते. संतोष रेड्डी या आरोपीला आज अटक करण्यात आली असून इतर दोघांचा भिवंडी गुन्हे शाखा घटक-२ चे पोलीस शोध घेत आहेत असे प्रसिद्धी माध्यमांना सांगण्यात आले.
