संपादक: मोईन सय्यद / प्रतिनिधी: अवधुत सावंत
मुंबईतील प्रसिध्द उद्योगपती मुकेश अंबानी व त्यांच्या कुटुंबाला धमक्या आल्याच्या घटनेवर तत्परतेने कारवाई करत मुंबई पोलीसांच्या पथकाने बिहार पोलीसांच्या मदतीने मध्यरात्री बिहारमधील दरभंगा येथील एका व्यक्तीला अटक केली आहे. राकेश कुमार मिश्रा असे या व्यक्तीचे नाव आहे.
बुधवारी दुपारी १ वाजण्याच्या सुमारास रिलायन्स फाउंडेशनच्या ‘सर एच एन हॉस्पिटल’ च्या लँडलाईनवर एक अज्ञात नंबरवरुन कॉल आला होता व हे प्रशस्त हॉस्पिटल बॉम्बने उडवून देण्याची धमकी या कॉलच्या माध्यमातून देण्यात आली. तसेच मुकेश अंबानी आणि नीता अंबानी यांनाही जीवे ठार मारण्याची धमकी यावेळी देण्यात आली होती .
मुंबई पोलीसांनी या घटनेची तातडीने गंभीर दखल घेत तपासला सुरुवात केली. तपासात बिहारमधील दरबंगा शहरातून राकेश कुमार मिश्राला ताब्यात घेण्यात आले. त्याच्या विरुद्ध भादंवि कायदा कलम ५०६ (२),५०७ अंतर्गत गुन्हा दाखल करत त्याला अटक करण्यात आली आहे. मुंबई पोलीसांनी त्याला पुढील तपासासाठी ताब्यात घेऊन मुंबईत आणले आहे. राकेश कुमार मिश्राने धमकी का दिली ? याची चौकशी मुंबई पोलीस करत आहेत.
