लातूर, प्रतिनिधी : महाराष्ट्रातील लातूर जिल्ह्यातील अहमदपूर तालुक्यातील शिरूर ताजबंद येथील महादेव वाडी पाझर तलावाच्या पश्चिमेला एक हँड ग्रेनेड/हातगोळा सदृश वस्तू.आढळून आली आहे. याबाबत परिसरातील एका जागरूक नागरिकांने पोलिसांना याची माहिती देताच तात्काळ पोलिसांनी याची दखल घेत संपूर्ण परिसर ताब्यात घेऊन या वस्तू पासून कुणालाही धोका होणार नाही याची दक्षता घेतली असून ती वस्तू ताब्यात घेऊन तिचे रासायनिक विश्लेषण करण्यासाठी प्रयोगशाळेत पाठविली आहे.
जनतेने घाबरू नये आणि कुणीही अफवा पसरवू नये!
याबाबत अधिक माहिती देताना लातूरचे जिल्हा पोलीस अधीक्षक डॉ निखिल पिंगळे यांनी सांगितले कि जोपर्यंत त्या वस्तूचे प्रयोगशाळेत रासायनिक विश्लेषण होत नाही तोपर्यंत कुणीही आपल्या मनाचे निष्कर्ष मांडू नये. त्या बॉम्ब सदृश्य वस्तू बाबत आपण आत्ताच नक्की काही सांगू शकत नाही! हा बॉम्ब आहे कि आणखीन काही आहे? तो खरा आहे की खोटा? शिवाय असे डमी बॉम्ब देखील असतात, तो जुना देखील असू शकतो. नष्ट केल्यानंतर तपास करून रासायनिक प्रयोगशाळेकडून त्याचा सविस्तर अहवाल हाती आल्यानंतर मगच याची खात्री होऊ शकते की हा खरा आहे कि खोटा आहे? कधीचा आहे किंवा डमी आहे. त्यामुळे इतर कुठलीही अफवा कोणीही पसरवू नये आणि लोकांमध्ये भीतीचे वातावरण निर्माण होणार नाही याची दक्षता घ्यावी. असे आवाहन लातूरचे जिल्हा पोलिस अधीक्षक डॉ निखिल पिंगळे यांनी नागरिकांना केले आहे.
हि बॉम्ब सदृश्य वस्तू कुठून आली? ती नेमकी काय वस्तू आहे? याबाबत लातूर पोलीस पुढील तपास करीत आहेत तरी नागरिकांनी घाबरून जाऊ नये किंवा याबाबत कोणतीही अफवा पसरवू नये असे आवाहन लातूर पोलिसांनी केले आहे.
