संपादक: मोईन सय्यद / प्रतिनिधी: अवधुत सावंत
मोबाईल फोन व लॅपटॉपच्या सहाय्याने कोविड-१९ च्या अनुषंगाने बनावट कोविड निगेटिव्ह रिपोर्ट तयार करून नागरिकांकडून जास्त पैसे वसुलून फसवणूक करणाऱ्या दोन इसमांना कक्ष-१० गुन्हे शाखेने अटक केली आहे.
याबाबत मिळालेले वृत्त असे आहे की मेघवाडी पोलीस ठाण्याच्या हद्दीतील कुलाबा प्लॉट, जोगेश्वरी (पूर्व) मुंबई येथे काही इसम त्यांच्याकडील मोबाईल फोन व लॅपटॉपच्या साहाय्याने कोविड-१९ च्या पार्श्वभूमीवर नागरिकांना बनावट निगेटिव्ह रिपोर्ट तयार करून देतात आणि स्वतःच्या आर्थिक फायद्यासाठी नागरिकांकडून जास्त रक्कम वसुलून शासनाची व नागरिकांची फसवणूक करतात अशी माहिती पोलिसांना मिळाली होती.
सदर मिळालेल्या माहितीच्या अनुषंगाने पोलिसांनी सदर ठिकाणी छापा टाकला असता सदर दोन इसम KRSNAA DIAGNOSTICS व LIFE CARE DIAGNOSTICS या लॅबच्या मूळ कोविड रिपोर्ट मध्ये त्यांच्याकडील मोबाईल फोन व लॅपटॉपच्या साहाय्याने फेरफार करून कोविड निगेटिव्ह असल्याबाबतचे बनावट रिपोर्ट तयार करत असताना मिळून आले.
सदर प्रकरणी त्यांचे मोबाईल फोन, लॅपटॉप जप्त करून त्यांच्याविरुद्ध मेघवाडी पोलीस ठाण्यात गुन्हा दाखल करून त्यांना अटक करण्यात आली आहे.
