संपादक: मोईन सय्यद / प्रतिनिधी: अवधुत सावंत
गेल्या दोन आठवड्यांपासून राज्यात अनेक घडामोडी घडत आहेत. शिवसेनेचे महत्वाचे नेते एकनाथ शिंदे यांनी सेनेविरुद्ध बंड पुकारले. त्यानंतर शिवसेना आणि अपक्ष मिळून जवळपास ५० आमदार या बंडात सहभागी झाले, परिणामी राज्यातील महविकास आघाडी सरकार अल्पमतात आलं. यानंतर उद्धव ठाकरे यांनी मुख्यमंत्रीपदाचा राजीनामा द्यावा लागला आणि महाविकास आघाडीचं सरकार कोसळलं. शिंदे गट आणि भाजपने बहुमत सिद्ध करून राज्यात सरकार स्थापन केलं. मात्र, राज्यातील या सत्तातरानंतर उद्धव ठाकरे यांना आता आणखी एक मोठा धक्का बसला आहे. कारण, ठाण्यात शिवसेनेला आता मोठं खिंडार पडलेलं आहे.
नगरसेवकांमधील शिवसेनेतील मोठा गट शिंदे गटात जाणार असल्याची माहिती समोर आली आहे. ठाण्यातले शिवसेनेचे ६६ नगरसेवक शिंदे गटात सहभागी होणार असल्याचं म्हटलं जात आहे. यामुळे ठाणे महानगरपालिकेतील अर्धे नगरसेवक शिंदे गटात सहभागी होत आहेत.
६६ नगरसेवक एकनाथ शिंदे यांच्या भेटीला गेले होते. माजी महापौर नरेश म्हस्केंसमवेत ६६ नगरसेवक मुख्यमंत्री एकनाथ शिंदे यांच्या भेटीला गेले होते. यावेळी त्यांनी आपलं समर्थन शिंदे गटाला दिलं. विशेष म्हणजे, शिवसेनेचा एकही नगरसेवक आता ठाणे महानगरपालिकेत राहिलेला दिसत नाही.
ठाणे जिल्ह्यात एकनाथ शिंदे यांचा शब्द सर्वस्व मानला जातो. मुंबई प्रमाणेच ठाणे महानगर पालिकाही शिवसेनेसाठी तितकीच महत्त्वाची आहे. अशातच शिवसेनेचे ६६ नगरसेवक शिंदे गटात सहभागी झाल्याने शिवसेनेला ठाण्यात मोठं खिंडार पडलं आहे.
