संपादक: मोईन सय्यद / प्रतिनिधी: अवधुत सावंत
केंद्रातील मोदी सरकार ने आज सर्वसामान्यांना मोठा दिलासा दिला आहे. केंद्रातील सरकारने पेट्रोल आणि डिझेल वरील उत्पादन शुल्कात आज मोठ्या कपातीची घोषणा केली आहे. पेट्रोलचे उत्पादन शुल्क तब्बल ८ रुपये तर डिझेलचे उत्पादन शुल्क तब्बल ६ रुपयांनी कमी करण्यात आल्याची घोषणा केंद्रातील अर्थमंत्री निर्मला सितारमण यांनी केली आहे. त्यामुळे पेट्रोलचे दर प्रतिलिटर ९.५० रुपये आणि डिझेलचे दर ७ रुपयांनी कमी होणार आहेत. याशिवाय केंद्र सरकारने ‘प्रधानमंत्री उज्ज्वला’ योजनेच्या ९ कोटींहून अधिक लाभार्थ्यांना प्रति गॅस सिलेंडर (१२ सिलिंडरपर्यंत) २०० रुपये सबसिडी देण्याची घोषणा केली. अर्थमंत्री निर्मला सितारमण म्हणाल्या की, यामुळे आपल्या माता-भगिनींना एकप्रकारे आर्थिक मदतच होईल.
देशातील सर्वात महाग पेट्रोल महाराष्ट्रातील परभणी मध्ये १२३.४६ रुपये प्रति लिटर, तर आंध्र प्रदेशातील चित्तूरमध्ये डिझेल १०७.६१ रुपये प्रतिलिटर आहे. त्याच वेळी, पोर्ट ब्लेअर मध्ये सर्वात स्वस्त पेट्रोल ९१.४५ रुपये आणि डिझेल ८५.८३ रुपये प्रति लिटर होते. त्याच वेळी, देशाची राजधानी दिल्लीत पेट्रोलचा दर १०५.४१ रुपये प्रति लिटर आणि डिझेलचा दर आज ९६.६७ रुपये प्रति लिटर आहे. मुंबईत पेट्रोल १२०.५१ रुपये प्रति लिटर आणि डिझेल१०४.७७ रुपये दराने विकले जात आहे. मात्र आता उत्पादन शुल्कात कपात केल्यानंतर देशभरात पेट्रोल आणि डिझेलचे दर आता कमी होणार आहेत.
