संपादक: मोईन सय्यद / प्रतिनिधी: अवधुत सावंत
ऑलिम्पिक खेळांमध्ये ट्रॅक आणि फील्ड सुवर्णपदक जिंकणारा पहिला भारतीय बनल्यानंतर, हा भारतीय स्टार जागतिक ऍथलेटिक्स चॅम्पियनशिप मध्ये पदक जिंकणारा केवळ दुसरा भारतीय बनला आहे. नीरजने रविवारी, २४ एप्रिल रोजी अमेरिकेतील ओरेगॉन येथे झालेल्या जागतिक ऍथलेटिक्स चॅम्पियनशिपमध्ये पुरुषांच्या भालाफेकच्या अंतिम फेरीत ८८.१३ मीटरच्या सर्वोत्तम प्रयत्नांसह रौप्य पदक जिंकले. अँडरसन पीटर्सने सुवर्णपदक (९०.४६ मीटर) जिंकले.
नीरज चोप्राचा पहिला जॅविलियन थ्रो फाऊल होता. दुसऱ्या थ्रोमध्ये नीरजने ८२.३९ मीटर, तिसऱ्या थ्रोमध्ये नीरजने ८६.३७ मीटर, चौथ्या प्रयत्नात नीरजने ८८.१३ मीटर फेक केली, तर पाचव्या फेरीत तो अपयशी ठरला. या स्पर्धेतील त्याची सर्वोत्तम कामगिरी ८८.१३ मीटर होती याच थ्रो चा मदतीने त्याने दुसरे स्थान कायम राखत रौप्यपदक जिंकण्यात यश मिळवले आहे.
ग्रेनेडाचा अँडरसन वन पीटर्सनं सुवर्णपदक जिंकले आहे. त्याने पहिल्या प्रयत्नात ९०.२१ मीटर तर दुसऱ्या प्रयत्नात ९०.४६ मीटर भाला फेकला. रौप्यपदक विजयानंतर नीरज चोप्राने सांगितले की, वाऱ्यामुळे काहीसा त्रास झाला. पण मी माझे सर्वोत्तम देण्याचा प्रयत्न केला. स्पर्धा कठीण होती, शिकण्यासारखं खूप होतं, अशी भावना त्याने व्यक्त केली.
नीरज १९ वर्षांचा असताना २० वर्षांखालील वर्ल्ड चॅम्पियनशिप जिंकून प्रकाशझोतात आला. त्यावेळी त्याने ८६.४८ मीटरचा जागतिक विक्रमही रचला. त्यासाठी फेसबुकचे संस्थापक मार्क झुकरबर्ग यांनी नीरजचं कौतुक केलं होतं. आणि फेसबुकवर पोस्टही लिहिली होती. पुढे २०१८ मध्ये त्याने कॉमनवेल्थ आणि एशियन गेम्समध्ये गोल्ड जिंकलं. ही कामगिरी करणारा तो पहिला भारतीय भालाफेकपटू. त्याचवर्षी भारत सरकारने नीरजला अर्जुन पुरस्कारानेही सन्मानित केलं.
पण तब्बल १९ वर्षांनंतर या चॅम्पियनशिपमध्ये देशाला पदक मिळाले आहे. नीरजच्या आधी अंजू बॉबी जॉर्जने २००३ मध्ये लांब उडीत कांस्यपदक जिंकले होते. या चॅम्पियनशिपमध्ये रौप्यपदक जिंकणारा नीरज हा पहिला भारतीय खेळाडू तसेच पुरुष खेळाडू ठरला आहे.
