संपादक: मोईन सय्यद / प्रतिनिधी: अवधुत सावंत
राज्यातील नवे सरकार स्थापन झाल्यानंतर मंत्रिमंडळ विस्ताराला आता गती मिळत असताना भाजप व शिंदे गटाच्या काही आमदारांचा शपथविधी झाला आहे. मंत्रिमंडळाच्या शर्यतीत काही जणांना सुगीचे दिवस आले आहेत, तर काही माजी मंत्र्यांना डावलल्याने आता अंतर्गत धुसफूस निर्माण होताना दिसत आहे. भाजपच्या आमदार पंकजा मुंडे यांची देखील एकनाथ शिंदे – देवेंद्र फडणवीस यांच्या मंत्रिमंडळात वर्णी लागेल असा अंदाज होता, परंतू तो साफ खोटा ठरला. पंकजा मुंडे यांना मंत्रिमंडळात स्थान न दिल्याने त्यांच्या समर्थकांमध्ये नाराजी दिसून येत आहे, स्वतः पंकजा मुंडे यांनी काल याबाबाबत नाराजी व्यक्त केली होती. आता भाजपचे माजी नेते व हल्लीचे राष्ट्रवादी काँग्रेसचे आमदार एकनाथ खडसे यांनी पंकजा मुंडे यांना खास सल्ला दिला आहे.
एकनाथ खडसे यांनी पंकजा मुंडे यांना मंत्रिपद हवे असल्यास त्यांनी थेट पक्षातील वरिष्ठांना भेटण्याचा सल्ला दिला आहे, यावेळी मत व्यक्त करताना एकनाथ खडसे म्हणाले की, गोपीनाथ मुंडे यांच्या जवळच्या लोकांना तसेच ओबीसींचे प्रतिनिधित्व करणाऱ्या नेत्यांना नेहमीच डावलण्याचा प्रकार घडला आहे. माझ्याबाबतीत सुध्दा नेमका हाच प्रकार झाला होता, त्यामुळे पंकजा यांनी थेट पक्षातील वरिष्ठांना भेटून आपली भूमिका स्पष्ट करावी असे सुचवले.
एकंदरीतच नाराज नेत्यांनी आता नाराजीचा सूर आवळणे सुरु केले असून येत्या काळात पंकजा मुंडे व्यतिरिक्त एकनाथ शिंदे गटातील काही आमदार त्यांची नाराजी व्यक्त करतात की ‘जैसे थे’ भूमिका घेतात हे बघणे आता महत्वाचे ठरणार आहे.
