वाढत्या कोरोनाचा प्रसार रोखण्यासाठी शनिवार व रविवारी राज्यात पूर्णतः लॉकडाऊन तर इतर दिवशी कडक निर्बंध
संपादक: मोईन सय्यद / प्रतिनिधी: अवधुत सावंत
मागील दोन दिवसांपासून राज्याचे मुख्यमंत्री उद्धव ठाकरे यांनी अनेक सामाजिक कार्यकर्ते, पत्रकार, वैद्यकीय क्षेत्रातील तसेच विरोधी पक्षांच्या नेत्यांची बैठक घेऊन लॉकडाऊन विषयी चर्चा केली होती अखेर आज मंत्रिमंडळाची बैठक घेऊन राज्यातील कडक निर्बधांची घोषणा केली आहे. आता राज्यात दिवसा जमावबंदी लागू असेल व रात्री 08 नंतर संचार बंदी केली असून शनिवार व रविवारी पूर्णतः कडक लॉकडाऊन असेल.
सिनेमागृह, नाट्यगृह, खेळाची मैदाने पुर्णपणे बंद राहणार आहेत. तसेच हॉटेल, मॉल्स, गार्डन देखील बंद राहणार असून हॉटेल पार्सलसेवा पुरता सुरू राहील. राज्यातील सर्व शासकीय आस्थापनातील कर्मचाऱ्यांना ५० टक्के क्षमतेने तर इतर कर्मचाऱ्यांना वर्क फ्रॉम होम याला प्राधान्य देण्याचे निर्देश दिले आहेत.
राज्यात संपूर्ण लॉकडाऊन जरी लागला नसला तरी कोरोनाचा प्रसार थांबविण्यासाठी नागरिकांनी शासकीय नियमांचे काटेकोरपणे पालन करावे असे राज्य सरकारने जनतेला जाहीररीत्या आव्हान केले आहे.
